Padraun prinsipál ba inkluzaun

Padraun prinsipál ba inkluzaun

1: Identifikasaun

Identifika ona ema idozu no ema ho defisiénsia atu garante sira asesu ba asisténsia umanitáriu no protesaun ne’ebé mak partisipativu, apropriadu no relevante ba sira nia nesesidade.

2: Asesu ne’ebé justu no seguru

Ema idozu no ema ho defisiénsia iha asesu ba asisténsia umanitáriu ne’ebé justu no seguru.

3: Reziliénsia

Ema idozu no ema ho defisiénsia negativamente la-afeitadu, reziliénsia no preparadu liu no ladún iha risku nu’udar rezultadu husi asaun umanitáriu.

4: Koñesimentu no partisipasaun

Ema idozu no ema ho defisiénsia komprende sira nia direitu no partisipa iha foti desizaun ne’ebé mak afeita sira nia moris.

5: Komentáriu no Keixa-sira

Ema idozu no ema ho defisiénsia iha asesu ba mekanizmu keixa no komentáriu ne’ebé responsivu no seguru.

6: Koordenasaun

Ema idozu no ema ho defisiénsia asesu no partisipa iha asisténsia umanitáriu ne’ebé mak koordenadu no komplementáriu.

7: Aprendijazen

Organizasaun sira kolekta no aplika aprendijazen atu implementa asisténsia ida ne’ebé inkluzivu liu.

8: Rekursu Umanu

Staff no voluntáriu iha koñesimentu no atitude adekuadu atu implementa asaun umanitáriu ne’ebé inkluzivu, no ema idozu no ema ho defisiénsia iha oportunidade iguál ba empregu no halo serbisu voluntáriu iha organizasaun umanitáriu.

9: Jestaun Rekursu

Ema idozu no ema ho defisiénsia bele iha espetativa katak organizasaun umanitáriu manejia rekursu-sira ho maneira ida ne’ebé mak promove inkluzaun.

Padraun prinsipál ba Inkluzaun 1: Identifikasaun

Identifika ona ema idozu no ema ho defisiénsia atu garante sira asesu ba asisténsia umanitáriu no protesaun ne’ebé mak partisipativu, apropriadu no relevante ba sira nia nesesidade.

Asaun xave

1.1:
Kolekta, análiza no relata informasaun kona-ba ema idozu no ema ho defisiénsia iha sistema jestaun informasaun umanitáriu tomak.
1.2:
Partisipar diretamente ho ema idozu no ema ho defisiénsia atu identifika no monitoriza sira nia kapasidade no nesesidade no sira nia asesu ba asisténsia umanitáriu.

Nota Orientasaun

Orientasaun ba asaun xave 1.1: Kolekta, análiza no relata informasaun kona-ba ema idozu no ema ho defisiénsia iha sistema jestaun informasaun umanitáriu tomak.

Fontes atuál ba dadus

Bainhira disponivel, uza fontes atuál ba dadus atu hetan informasaun kona-ba ema idozu no ema ho defisiénsia. Fontes posível mak:

Sensu, database ministériu no database husi organizasaun ema ho defisiénsia (DPO) no asosiasaun ema idozu (OPA), bainhira sira eziste ba dadus populasaun nasionál;
Analizasaun situasaun ka avaliasaun nesesidade rápidu dezagregadu husi sexu, tinan no defisiénsia ba dadus populasaun ne’ebé mak afeitadu;
Analizasaun risku ba dadus barreira asesu no partisipasaun, kapasidade no estratéjia enfrenta krize;
Avaliasaun nesesidade dezagregadu husi grupu, ba dadus nesesidade ema idozu no ema ho defisiénsia;
Konsulta ho ema idozu (mane no feto) no ema ho tipu defisiénsia oioin (feto mane, labarik feto no labarik mane); no
Rejistrasaun eskola no programa protesaun sosiál ba dadus rejistrasaun eskola, empregu no benefisiu sosiál ba ema idozu no ema ho defisiénsia.

Tenke hanoin katak métodu koleksaun ne’ebé diferente dalaruma aplika ona ba fontes dadus ne’ebé mak diferente. Ida-ne’e bele rezulta iha inkonsisténsia iha dadus kona-ba ema idozu no ema ho defisiénsia.

Se karik dadus la-disponivel, uza estimasaun. Estimasaun porsentu 15 husi populasaun mundiál ne’ebé iha defisiénsia (feto porsentu 19.2 no mane porsentu 12).⁴ Estimasaun porsentu 13 husi populasaun mundiál mak tinan 60 ka ba leten.⁵ Ema idozu liuhusi porsentu 46 (tinan 60 no ba leten) iha defisiénsia.⁶

Dezagregasaun dadus

Kolekta no análiza dadus dezagregadu husi sexu, tinan, no defisiénsia sei ajuda Ita-Boot identifika ema idozu no ema ho defisiénsia, avalia sira nia kapasidade no nesedidade no buka hatene risku sira ne’ebé mak sira enfrenta.

Bainhira dezenvolve indikadór atu sukat progresu no mudansa, konstrui dadus hirak ne’e atu hatudu oinsá nesesidade barreira no partisipasaun ema idozu (feto no mane) no ema ho defisiénsia (feto mane, labarik feto no labarik mane), hatán ona.

Ba konsistensia, uza pergunta ne’ebé hanesan no indikadór sira iha etapa tomak husi siklu programa.

Uza kategoria tinan ne’ebé hetan ona rekomendasaun atu dezagrega dadus kona-ba tinan, no pergunta husi grupo Washington (Haree Instrumentu no rekursu sira) atu dezagrega dadus kona-ba defisiénsia:

Ba dadus tinan, uza kategoria ne’ebé mak hanesan iha sistema koleksaun dadus nasionál. Se karik laiha kategoria nasionál ba tinan, sujere uza tuir-mai ne’e: 0-5, 6-12, 13-17, 18-29, 30-39, 40-49, 50-59, 60-69, 70-79, no 80 ba leten.
Ba dadus kona-ba defisiénsia, uza pergunta badak husi Washington Group Tuir-mai ne’e pergunta 6 ne’ebé kria ona atu buka hatene se karik respondente iha difikuldade ruma bainhira halo atividade sira (lao, haree, rona, koñese, kuidadu- aan no komunikasaun). Kada pergunta iha kategoria resposta 4 (Lae – laiha difikuldade Sin – difikuldade balun, Sin – difikuldade barak ka labele halo atividade). Se karik ema ruma responde “sin – difikuldade barak” ka “labele halo atividade” maizumenus pergunta ida, tenke konsidera ne’e hanesan pontu cut-off ba klasifikasaun ema ho defisiénsia ba objetivu dezagregasaun dadus.

Labele muda lista, kategoria resposta ka pontu cut-off ba klasifikasaun defisiénsia husi pergunta Washington Group.

Ba labarik tinan-2 to’o tinan-17, uza lista pergunta Washington Group/UNICEF nia lista pergunta funsionamentu labarik, ne’ebé mak sensitivu liu ba dezenvolvimentu labarik (haree Instrumentu no rekursu).

Labele haluha: dezagrega dadus de’it sei la-ajuda Ita-Boot identifika barreira ba inkluzaun no partisipasaun ne’ebé mak ema idozu no ema ho defisiénsia hasoru. Dezagrega dadus mós sei la-ajuda Ita-Boot atu determina ema ida ninia elejibilidade ba asisténsia. Maibé nia sei ajuda Ita-Boot atu identifika grupu ema sira ne’ebé bele hasoru barreira no sujere barreira hirak ne’e iha ne’ebé.

Dadus barreira no fasilitasaun sira

Kolekta informasaun kona-ba fatór saida deit mak prevene asesu ba servisu husi ema idozu no ema ho defisiénsia (Haree ‘barreira’ iha Glósariu) no fatór saida mak bele permite sira nia asesu (Haree ‘fasilitasaun sira’ iha Glósariu). Kolekta informasaun ida-ne’e diretamente husi ema idozu no ema ho defisiénsia husi grupu tinan sira hotu.

Halo auditoria asesibilidade atu identifika barreira asesu ba servisu no fasilidade sira (Haree Instrumentu no rekursu). Ida-ne’e sei fornese orientasaun ba jestór projetu, fornesedór servisu, profesionál sira seluk no uzadór-sira kona-ba oinsá atu halo servisu ka fasilidade asesivel liután.

Hare’e fila fali Ita-Boot nia konkluzaun auditória asesibilidade atu garante katak nia kontinua hatán ona ba nesesidade no kapasidade ema idozu no ema ho defisiénsia.

Fó atensaun partikularmente ba barreira ne’ebé mak difikulta movimentu livre, uza fasilidade no asesu ba informasaun husi ema ho defisiénsia fíziku, visuál, sensoriál, intelektuál ka ema ho saúde mentál.

Konsidera barreira organizasaun. Avalia staff no voluntáriu sira nia atitude no abilidade kona-ba inkluzaun no partisipasaun ema idozu no ema ho defisiénsia. Ezemplu, halo avaliasaun koñesimentu, attitude no prátika.

Iha avaliasaun, inklui pergunta ne’ebé identifika koñesimentu, kapasidade no kontribusaun ne’ebé mak ema idozu no ema ho defisiénsia bele halo ba asaun umanitáriu.

Koleksaun dadus ne’ebé mak inkluzivu

Tenke garante katak prosesu koleksaun dadus ne’e rasik inkluzivu. Ezemplu:

Treinu staff ne’ebé responsável ba koleksaun dadus, oinsá atu komunika ho ema idozu no ema ho defisiénsia no oinsá atu dezagrega dadus liuhusi sexu, tinan no defisiénsia (Haree Nota orientasaun iha leten kona-ba dezagregasaun dadus);
Envolve ema idozu no ema ho defisiénsia iha koleksaun dadus (Haree nota orientasaun iha karaik ne’e kona-ba envolve ema idozu no ema ho defisiénsia).

Dezenvolve estratéjia (hanesan outreach) atu identifika no rejista ema idozu no ema ho defisiénsia ne’ebé mak dalaruma iha risku boot liu ba eskluzaun husi servisu, ka risku boot liu ba violénsia no abuzu. Ida-ne’e bele inklui ema ne’ebé izoladu iha uma ka hirak ne’ebé moris iha rezidensia institusaun hanesan orfanatu no uma kuidadus.

Halo entrevista pesoál no vizita ba uma atu kolekta informasaun husi ema ne’ebé dalaruma izoladu iha sira nia uma, ka ema ne’ebé prefere atu hasoru malu mesak.

Análiza dadus

Análiza dadus iha área saúde ka estatutu nutrisionál, asesu ba servisu, ka partisipasaun iha resposta umanitáriu, dezagregadu husi sexu, tinan no defisiénsia. Ezemplu, dadus kona-ba estatutu nutrisionál husi komunidade ne’ebé afeitadu, dezagregadu husi sexu, tinan no defisiénsia, sei hatudu ba Ita-Boot porsentajen ema idozu (feto no mane) no ema ho defisiénsia (feto mane, labarik feto no labarik mane) ne’ebé mak nia estatutu nutrisionál iha ona mudansa durante tempu balun.

Uza fontes informasaun suplementáriu, ezemplu auditoria kona- ba asesibilidade ka diskusaun foku grupu, atu hatene situasaun ema idozu no ema ho defisiénsia.

Uza dadus ida-ne’e hodi responde ba desafiu sira ne’ebé mak ema idozu no ema ho defisiénsia dalaruma hasoru bainhira partisipa ka asesu ba servisu (haree padraun prinsipál ba inkluzaun 2, Nota orientasaun kona-ba rezolve barreira).

Monitoriza dadus no fahe dadus

Regularmente kolekta no análiza dadus kona-ba oinsá Ita- Boot nia programa inklui ema idozu no ema ho defisiénsia. Se karik Ita-Boot identifika lakuna ruma bainhira Ita-Boot halo analizasaun, hanesan falta dadus dezagregadu ka dadus kona-ba barreira, kolekta dadus adisionál dezagregadu husi sexu, tinan no defisiénsia.

Hanesan mós bainhira uza dadus iha Ita-Boot nia organizasaun, tenke fahe dadus ne’e ho sistema koleksaun dadus koordenadu hanesan vizaun jerál kona-ba nesesidade umanitáriu, planu estratéjiku ba resposta, no sistema monitorizasaun koordenadu, hanesan Interkámbiu Dadus Umanitáriu, ka Plataforma Preparasaun ba Emerjénsia ALERT (ALERT Emergency Preparedness Platform).

Tenke mós fahe dadus avaliasaun no relatóriu monitorizasaun inklui lisaun aprendizazem, dezafiu no nesesidade sira ne’ebé mak seidauk alkansa ho ajénsia umanitáriu sira seluk.

Fahe dadus ho komunidade sira ne’ebé mak afeitadu husi krizi atu garante katak dadus hirak ne’e reprezenta ona sira nia nesesidade no kapasidade no barreira ne’ebé sira hasoru, no sira hatene ona oinsá atu uza dadus hirak ne’e.

Labele haluha: molok fahe Ita-Boot nia dadus, tenke kumpre protokolu fahe dadus atu proteje konfidensialidade.

Orientasaun ba asaun xave 1.2: liga diretamente ho ema idozu no ema ho defisiénsia atu identifika no monitoriza sira nia kapasidade nesesidade no asesu ba asistensia umanitáriu.

Envolve ema idozu no ema ho defisiénsia

Envolve ema idozu no ema ho defisiénsia bainhira dezenvolve koleksaun dadus no sistema monitorizasaun ne’ebé mak relevante, asesivel no kulturalmente apropriadu.

Dalaruma iha barreira ne’ebé mak prevene ema idozu no ema ho defisiénsia hodi partisipa iha atividade hirak ne’e Ezemplu, fatin konsultasaun dalaruma la-asesível, dalaruma la-tau mós atensaun ba kapasidade ema idozu ka ema ho defisiénsia atu kontribui ba avaliasaun uma-kain.

Apoiu diversidade iha grupu idozu no ema ho defisiénsia sira ne’ebé mak envolve. Ezemplu, inklui feto no mane ne’ebé tinan diferente no envolve ema ho tipu defisiénsia diferente, no apoiu sira nia partisipasaun ne’ebé signifikativu. Tenke konsidera organiza enkontru inisiu ho grupu ki’ik sira atu buka hatene oinsá Ita-Boot bele halo avaliasaun ka konsultasaun ida ne’ebé asesível liután.

Durante avaliasaun ka konsultasaun, komunika diretamente ho ema idozu no ema ho defisiénsia. Husu sira, ezemplu:⁷

Saida mak sira sente hanesan obstaklu prinsipál no oportunidade atu kontribui ba preparasaun, resposta no rekuperasaun;
Kapasidade saida mak sira iha no oinsá sira hakarak atu uza kapasidade hirak ne’e;
Oinsá atu alkansa nesesidade oioin husi ema ho tipu defisiénsia ne’ebé diferente (feto mane, labarik feto no labarik mane) no tinan ne’ebé diferente (feto no mane), hanesan oinsá atu komunika ho ema ho defisiénsia sensoriál.
Servisu no fasilidade saida mak sira uza, no fasilitasaun no barreira saida de’it mak sira hasoru bainhira asesu ba servisu no fasilidade hirak ne’e (haree Box 2 ‘Barreira ba inkluzaun’ iha karaik ne’e).

Envolve organizasaun komunitáriu

Halo mapamentu organizasaun iha área ne’ebé mak afeitadu husi krize ne’ebé organizasaun ne’e reprezenta no fornese servisu ba ema idozu no ema ho defisiénsia. Ida-ne’e bele inklui organizasaun komunitáriu, organizasaun ema ho defisiénsia (DPO) no asosiasaun ba ema idozu (OPA) (Haree Box 1 ‘Mapamentu organizasaun’ iha karaik ne’e).

Envolve organizasaun hirak ne’e iha koleksaun dadus kona-ba kapasidade no nesesidade ema idozu no ema ho defisiénsia. Ezemplu, envolve sira iha ekipa koleksaun dadus, diskusaun foku grupu ka voluntáriu iha avaliasaun nesesidade sira.

Instrumentu no rekursu

Koleksaun dadus

Ema ho defisiénsia sira

Washington Group on Disability Statistics, The Washington Group Short Set of Questions on Disability http://bit.ly/2daMyJb (15 December 2017)

UNICEF and Washington Group on Disability Statistics, Child Functioning Question Sets http://bit.ly/2hDVZOR (15 December 2017)

Ema idozu

HelpAge International, Valid International, and Brixton Health, RAM-OP: Rapid Assessment Method for Older People, http://bit.ly/1ljkF0z (15 December 2017)

Dezagregasaun sexu

Inter-Agency Standing Committee, Women, Girls, Boys and Men: Different needs – equal opportunities, Gender Handbook in Humanitarian Action, IASC, 2006 http://bit.ly/2keX9o2

Auditoria Asesibilidade

Handicap International Technical Resources Division, Practical Guide: Conduct an accessibility audit in low- and middle- income countries, Lyon, Handicap International, 2014 http://bit.ly/2ad0V9y

Tipu barreira sira

CBM, Inclusive Project Cycle Management Trainers’ Manual: Stage 1/Handout 2, Inclusion and Barriers to Inclusion, CBM http://bit.ly/2BsbnsO

Box 1

Mapamentu organizasaun

Organizasaun ema ho defisiénsia (DPO) no asosiasaun ema idozu (OPA) normalmente forma atu apoiu empoderamentu ema idozu no ema ho defisiénsia no halo advokasia ba sira nia direitu.

Grupu hirak ne’e dalaruma la-eziste iha komunidade sira ne’ebé mak afeitadu husi krize Iha situasaun ida-ne’e, halo parseria ho organizasaun komunitáriu sira seluk atu apoiu sira atu inkluzivu liu-tán iha sira nia servisu. Bainhira DPO no OPA eziste sira laiha koñesimentu iha asaun umanitáriu. Iha situasaun ida-ne’e Ita-Boot bele serbisu ho sira atu haforsa sira nia kapasidade.

Bainhira halo mapamentu ba DPO, OPA ka grupu reprezentativu sira seluk:

Identifika sira nia prioridade ba asaun umanitáriu, sira nia forsa, kapasidade no área sira ne’ebé mak presiza atu haforsa liu-tán;
Husu sira kona-ba sira nia papel iha komunidade;
Husu sira reprezenta se oinsá sira kolekta informasaun husi populasaun ne’ebé mak afeitadu husi krize no oinsá sira promove igualdade jéneru no diversidade iha sira nia servisu; no
Haree ba organizasaun sira ne’ebé reprezenta tipu defisiénsia ne’ebé diferente jéneru, tinan no grupu iha risku ne’ebé diferente hanesan refujiadu, migrante ka ema husi étniku minoridade Grupu balun hanesan ema ho defisiénsia intelektuál ka saúde mentál, feto ho defisiénsia ka ema idozu ho defisiénsia, iha fatin balun dalaruma la-reprezenta iha organizasaun hirak ne’e. Iha situasaun ida-ne’e, Ita-Boot presiza identifika individuál duke grupu sira.

Labele haluha: Envolve autoridade lokál iha ezersisu mapamentu ida-ne’e. Ida-nee bele fó sira oportunidade atu haforsa liu-tán sira nia ligasaun ho DPO no OPA.

Box 2

Barreira ba inkluzaun

Barreira ba inkluzaun bele inklui:

Atitude. Atitude negativu no diskriminasaun iha parte ida, ka protesaun ida ne’ebé rigor iha parte seluk bele kauza husi interpretasaun ida ne’ebé la loos kona-ba defisiénsia ka ema idozu. Ezemplu, ema iha komunidade dalaruma fi’ar katak ema idozu ka ema ho defisiénsia labele partisipa iha resposta. Inan-Aman dalaruma subar labarik ho defisiénsia iha uma tanbá sira hanoin katak defisiénsia hanesan moe ida ba família. Fatór sira hanesan defisiénsia, tinan no jéneru la izoladu: interseksaun entre sira bele kria forma diskriminasaun oi-oin.
Ambientál. Barreira sira inklui barreira fíziku atu asesu ba ambiente ne’ebé ema harii ona, no barreira ba informasaun no komunikasaun. Ezemplu, se karik uza deit formatu ida atu fornese informasaun kona-ba servisu umanitáriu duke formatu diferente hanesan asinatura tatíl, lian jestuál, áudiu ka imajen, ida-ne’e bele sai barreira ida. Barreira ba informasaun dalaruma ladún haree hetan duke barreira fíziku, maibé importante atu detekta sira tanbá barreira hirak nee bele esklui ema grupu boot.
Institusionál. Lei, polítika no prosedimentu sira (inklui organizasaun umanitáriu nian) bele hamosu diskriminasaun neebé halo ho intensaun ka la ho intensaun hasoru ema grupu balun. Barreira hirak nee bele haketak ema idozu no ema ho defisiénsia husi direitu oi-oin hanesan empregu, partisipasaun polítiku edukasuan no servisu sosiál.

Estudu Kazu

Kolekta dadus defisiénsia uza pergunta sira husi Washington Group

Organizasaun internasional Aleijaun (Handicap) lidera projetu ida ne’ebé hanaran ‘Estatístiku Defisiénsia iha Asaun Umanitáriu’, ne’ebé kria atu teste no avalia pergunta sira husi Washington Group iha asaun umanitáriu. Liuhusi projetu ida- ne’e, organizasaun Handicap International kolabora ona ho parseiru lubun ida ne’ebé mak servisu iha setór no kontestu ne’ebé diferente no kria ona materiál ba treinamentu.

Projetu ne’e identifika dezafiu lubun ida ne’ebé mak ema hasoru bainhira kolekta dadus kona-ba ema ho defisiénsia. Izemplu, ema ne’ebé kolekta dadus dalaruma haree defisiénsia husi perspetiva médiku, foku liu ba ema nia defisiénsia ka kondisaun médiku. Sira mós hetan katak iha kazu barak sistema jestaun informasaun dadus atuál, dalaruma la-aliña ho pergunta sira husi Washington Group no defisil atu adapta.

Hanesan parte ida husi projetu ne’e, Handicap International servisu hamutuk ho parseiru sira atu adapta sistema no instrumentu koleksaun dadus atuál. Sira mós fornese ona treinamentu ba kolektór dadus sira, atu hatudu oinsá kolekta dadus kona-ba defisiénsia no oinsá uza perguntas Washington Group Atu ajuda haforsa liu-tán partisipante sira nia koñesimentu no permite sira atu prátika sira nia abilidade, sira fó ona oportunidade hodi halo teste iha no entrevista simulada nu’udar parte ida husi treinamentu.

Bainhira barreira ba koleksaun dadus ne’e rezolve ona, informasaun hahu mosu husi projetu no bele ajuda informa programasaun. Ezemplu, kolekta dadus uza pergunta Washington Group iha pontu rejistrasaun iha kampu refujiadu, ajuda indika seraké refujiadu ho defisiénsia bele asesu ba kampu refujiadu. Rezultadu husi projetu hatudu katak uza pergunta Washington Group signifikativamente identifika ema ho defisiénsia barak liu duke bainhira uza métodu koleksaun dadus atuál. Bainhira halo pílotu ba pergunta Washington Group iha entrevista 98, ezemplu, UNHCR relata katak identifikasaun ema ho defisiénsia sa’e dala-sanulu, husi porsentu 2.36 to’o porsentu 27.55. Dadus hanesan hirak ne’e bele uza atu avalia seraké programa ida inkluzivu no bele komplementa liuhusi análiza kualker barreira ba inkluzaun.

Fontes: Handicap International

Padraun Prinsipál ba Inkluzaun 2: Asesu ne’ebé justu no seguru

Ema idozu no ema ho defisiénsia iha asesu ne’ebe justu no seguru ba asisténsia umanitáriu.

Asaun xave

2.1:
Address barriers that affect participation and access to services.
2.2:
Strengthen factors that enable older people and people with disabilities to participate and have access to services.

Nota orientasaun

Orientasaun ba asaun xave 2.1: rezolve barreira ne’ebé mak afeita asesu no partisipasaun ba servisu.

Barreira atitude

Sensibiliza komunidade inklui lidér traballadór komunitáriu no kuidadór sira kona-ba direitu ema idozu no ema ho defisiénsia.

Sensibiliza organizasaun inklui parseiru, fornesedór servisu, ema sira ne’ebé halo polítika no ajénsia koordenadór no implementadór kona-ba oinsá atu prevene diskriminasaun.

Barreira ambientál

Barreira fíziku. Dezeñu fasilidade no sistema distribusaun ne’ebé mak asesível ba ema hotu, independentemente ba tinan ka defisiénsia⁸ (Haree Box 3 iha karaik ne’e ‘Saida mak asesibilidade?’).

Aplika padraun asesibilidade nasionál bainhira disponivel. Serbisu ho autoridade nasionál hanesan ministériu no/ka peritu atu identifika lakuna no solusaun sira. Se karik laiha padraun nasionál, bele refere ba padraun internasionál hanesan padraun kona-ba ambiente ne’ebé kria ona husi Organizasaun Internasionál ba Estandardizasaun (Haree Instrumentu no rekursu).

Se karik nesesáriu, halo modifikasaun no ajustamentu atu apoiu ema idozu no ema ho defisiénsia atu asesu ba servisu, atividade no programa bazeia ba indivídu. Ida-ne’e refere hanesan “akomodasaun razoável” iha Artigu 2 husi Konvensaun kona-ba Direitu Ema ho Defisiénsia (CRPD) (Haree ‘akomodasaun razoável’ iha Glósariu). Ezemplu, bainhira Ita-Boot organiza enkontru, fornese subsídiu transporte ba ema ne’ebé mak dalaruma hasoru barreira atu uza transporte públiku ka lao ho distansia ne’ebé dook.

Apoiu ema idozu no ema ho defisiénsia atu partisipa iha dezeña no implementasaun servisu ho kondisaun iguál hanesan ema seluk.

Barreira ba informasaun. Fornese informasaun liuhusi kanál komunikasaun oioin no iha formatu ne’ebé diferente atu nune’e asesível ba ema hotu.

Konsulta ho ema idozu, ema ho defisiénsia no sira nia organizasaun reprezentativu kona-ba sira nia prefererénsia ba Ita-Boot atu komunika ho sira.

Uza lian ne’ebé simples no formatu oioin depende ba nesesidade hanesan interpretasaun lian jestuál lokál ka universál, testu diretu, formatu ida ne’ebé fasil atu lee (testu simples kombina ho imajen), ka uza Braille (se karik audiensia uza braille). Garante katak informasaun eskrita fasil atu lee ezemplu uza letraboot no kor ne’ebé kontras.

Barreira institusionál

Integra respeitu ba direitu ema idozu no ema ho defisiénsia ba iha polítika organizasaun no kódigu konduta.

Dezeñu ka adapta instrumentu koleksaun dadus atu dezagregasaun dadus husi sexu, tinan no defisiénsia.

Sensibiliza staff kona-ba direitu ema idozu no ema ho defisiénsia.

Orsamentasaun atu rezolve barreira

Inklui rekursu dedikadu ba asesibilidade iha Ita-Boot nia orsamentu. Ba asesibilidade fíziku, konsidera orsamentu maizumenus adisionál porsentu 0.5-1. Ba item la’ós hahan no ekipamentu ajudu, konsidera orsamentu adisionál maizumenus porsentu 3-4.

Monitorizasaun ba asaun

Bainhira monitoriza Ita-Boot nia asaun sira atu hatán ba barreira, kolekta komentáriu husi ema idozu no ema ho defisiénsia kona- ba efikásia husi asaun hirak ne’e no oinsá atu bele hadi’ak liu-tán.

Orientasaun ba asaun xave 2.2: Haforsa fatór ne’ebé mak fasilita ema idozu no ema ho defisiénsia atu asesu no partisipa iha servisu.

Haforsa fatór sira ne’ebé mak identifika ona hanesan fasilitasaun ba asesu no partisipasaun. Hirak ne’e inklui:

Mekanizmu komunitáriu hanesan rede apoiu komunitáriu, programa reabilitasaun komunitáriu, DPO ka OPA (Haree ‘reabilitasaun komunitáriu’ iha Glósariu);
Kapasidade ema idozu no ema ho defisiénsia atu apoiu sira nia komunidade hodi responde ba krize bazeia ba sira nia esperiensia pasadu iha setór oioin, hanesan rekonstrusaun hela fatin ka saúde;
Programasaun no polítika nasionál hanesan polítika kona- ba asesibilidade ka benefisiu sosiál ba ema idozu ka ema ho defisiénsia;
Medida sira ne’ebé mak permite ema idozu no ema ho defisiénsia atu hetan akompañamentu husi ema ida ne’ebé mak sira hili, se karik sira presiza asisténsia ne’e – ema ne’e bele membru família, kuidadór ka asistente pesoál;
Mekanizmu referál ba servisu relevante garante informasaun ne’ebé asesível ba servisu hirak ne’e; no
Sistema komunikasaun ne’ebé asesível hanesan traballadór outreach ba komunidade konsellu komunitáriu ka radiu lokál.

Instrumentu no rekursu

Informasaun ne’ebé asesível – jerál

CBM, Humanitarian Hands-on Tool (HHoT), Information task card, CBM http://bit.ly/2AScPDL (15 December 2017)

Labarik no foin-sa’e

United Nations Children’s Fund (UNICEF), General Guidance: Including children with disabilities in humanitarian action, UNICEF, 2017 http://bit.ly/2zjrqtJ

Dezeñu website

W3C Web Accessibility Initiative, Web Content Accessibility Guidelines, WCAG, published 2005, updated 2017 http://bit.ly/26rBb27 (15 December 2017)

Aprezentasaun

World Blind Union, WBU PowerPoint Guidelines, WBU, 2007 http://bit.ly/2jafkdp

Asesu ba edifisiu

CBM, Humanitarian Hands-on Tool (HHoT), Building access task card, CBM, http://bit.ly/2zjsg9R (15 December 2017)

International Organization for Standardization, Building Construction: Accessibility and usability of the built environment, ISO 21542:2011, ISO, 2011 http://bit.ly/2CVjtdO

Box 3

Saida mak asesibilidade?

Asesibilidade mak kondisaun ida ne’ebé esensiál ba inkluzaun ema idozu no ema ho defisiénsia iha sira nia moris iha komunidade Asesibilidade tenke promove iha kualker situasaun.

Artigu 9 husi Konvensaun kona-ba Direitu ba Ema ho Defisiénsia (CRPD) fó importansia ba asesibilidade hanesan kompromisu ida atu fasilita ema ho defisiénsia “atu moris livre no partisipa másimu iha aspeitu moris sira hotu”. Ida- ne’e signifika foti medida adekuadu atu garante asesu ho kondisaun iguál hanesan ema seluk, ba iha ambiente fíziku, transporte, informasaun no komunikasaun inklui sistema no teknolojia informasaun no komunikasaun, fasilidade no servisu sira seluk ne’ebé mak loke ka fornese ba públiku, tantu iha área urbanu no rurál.

Depende ba kontestu, ida dalan oioin atu halo ambiente ida asesível. Independentemente husi rekursu ne’ebé disponivel, tenke aplika hela deit prinsípiu dezeñu universál (Haree Glósariu).

Bainhira hanoin kona-ba asesibilidade hanoin prinsípiu RECU – To’o ba iha (Reach), Tama (Enter), Sirkula (Circulate) no Uza (Use), signifika ema hotu fásil atu:

To’o ba Iha (Reach) edifísiu, fatin públiku no komunikasaun, transporte no servisu seluk ne’ebé mak sira hakarak atu uza.
Tama (Enter) edifisíu no espasu sira seluk, no iha asesu ba materiál eskrita no mensajen ne’ebé mak transmite ona.
Sirkula (Circulate) iha edifísiu laran no fatin sira seluk.
Uza (Use) servisu sira hotu neebé mak ema fornese no uza materiál komunikasaun sira hotu.

Box 4

Asesu ne’ebé justu ba asisténsia osan kas

Konsidera medida sira tuir-mai ne’e atu fasilita ema idozu no ema ho defisiénsia atu simu osan kas ka kupáun:

Husu ema idozu no ema ho defisiénsia, tipu apoiu saida mak sira prefere liu hanesan sasán, kupáun ka transferénsia osan kas;
Se karik sira prefere osan kas, garante katak mekanizmu fó osan kas tenke asesível – ezemplu, halo informasaun disponivel iha formatu oioin no fásil atu ema lee no komprende – no garante katak ema idozu no ema ho defisiénsia bele asesu ka to’o iha merkadu, loja no pontu distribusaun osan kas, inklui mákina foti osan kas (ATM);
Se karik nesesáriu, fornese apoiu adisionál ba ema idozu no ema ho defisiénsia atu asesu ba asisténsia osan kas no atu uza sistema distribusaun osan kas hanesan sistema bankária, se karik sira la-familiár ho teknolojia;
Ba ema sira ne’ebé mak hakarak atu nomeia ema ida atu reprezenta sira kolekta sira nia osan kas ka kupáun, tenke garante katak sistema ne’e permite sira atu hili ema ida ne’ebé mak sira fi’ar atu foti osan no minimiza kualker risku ne’ebé bele mosu;
Minimiza konsekuénsia negativu ne’ebé bele mosu iha asisténsia osan kas ba ema idozu no ema ho defisiénsia hanesan kustu adisionál sira ne’ebé mak bele mosu – ezemplu, sira dalaruma tenke selu transporte atu ba to’o iha merkadu, ka ba ema ida atu ajuda sira ba kolekta ka gasta osan; no
Verifika katak ema idozu no ema ho defisiénsia simu sira nia osan kompletu no la-tau sira iha risku ruma bainhira simu asisténsia osan kas – ezemplu, sira bele hasoru risku ema na’ok ka violénsia ka forma abuzu sira seluk.

Nota: inkluzaun ema idozu no ema ho defisiénsia iha programa asisténsia osan kas iha situasaun emerjénsia, presiza atensaun liután duke saida mak aplika daudaun ne’e Presiza orientasaun bazeia ba evidénsia ne’ebé barak liután.

Estudu Kazu

Resposta inkluzivu ba inundasaun iha Nyando, Kenya

Inundasaun mak problema permanente iha distritu Kisumu, Kenya. Iha Novembru 2015, Sosiedade Cruz Vermelha Kenya (KRCS) nia ekipa resposta distritu tun atu ajuda ema kuaze 1,200 ne’ebé mak afeitadu husi inundasaun.

Iha tempu ne’e KRCS iha faze inisiu sira nia programa inkluzivu. Iha ona atividade hasa’e konxiensia ho sira nia ekipa resposta, ne’ebé sira aprende katak durante inundasaun, ema idozu no ema ho defisiénsia jeralmente tenke evakua ho seguru iha ema ida nia kotuk ka tula gratuita ho karreta.

Hafoin alerta sedu kona-ba inundasaun, halo mapamentu ho apoiu husi lidér no autoridade lokál. Atividade ida-ne’e fasilita ekipa resposta atu identifika uma-kain ne’ebé mak iha risku boot liu.

Ekipa resposta prioritiza grupu refere uza informasaun husi mapamentu ne’e, hamutuk ho koñesimentu kona-ba risku boot ne’ebé ema idozu no ema ho defisiénsia no feto isin- rua sira hasoru. Hanesan parte ida husi evakuasaun, ekipa ne’e planu atu uza roo motorizada, foku ba ema hirak ne’ebé mak iha risku liu atu bee lori.

Komentáriu ne’ebé ekipa resposta simu sujere katak ema ne’ebé sira evakua konsidera métodu ida-ne’e dignu liu no sira sente protejidu liu durante prosesu evakuasaun. Maibé, iha faze inisiu hirak ne’e, komponente partisipasaun inkluzaun seidauk sai parte husi métodu ne’e, signifika ema idozu no ema ho defisiénsia seidauk hola parte iha prosesu foti desizaun. Elementu importante ida-ne’e ikus mai sei inklui iha aproximasaun husi Sosiedade Cruz Vermelha Kenya.

Fontes: Sosiedade Cruz Vermelha Kenya

Padraun Prinsipál ba Inkluzaun 3: Reziliénsia

Ema idozu no ema ho defisiénsia negativamente la-afeitadu, reziliénsia no preparadu liu no ladún iha risku hanesan rezultadu ida husi asaun umanitáriu.

Asaun xave

3.1:
Haforsa kapasidade no lideransa ema idozu no ema ho defisiénsia, no sira nia organizasaun reprezentativu atu kontribui ba preparasaun resposta no rekuperasaun ida ne’ebé inkluzivu.
3.2:
Identifika, avalia no redus risku ne’ebé ema idozu no ema ho defisiénsia hasoru iha situasaun emerjénsia.
3.3:
Prioritiza seguransa no dignidade ema idozu no ema ho defisiénsia durante faze tomak husi asaun umanitáriu no evita hamosu perigu ruma.

Nota orientasaun

Orientasaun ba asaun xave 3.1: Haforsa kapasidade no lideransa ema idozu no ema ho defisiénsia, no sira nia organizasaun reprezentativu atu kontribui ba preparasaun resposta no rekuperasaun ida ne’ebé inkluzivu.

Haforsa kapasidade no lideransa ema idozu no ema ho defisiénsia. Ezemplu:

Apoiu sira hanesan oradór moderadór no partisipante iha mekanizmu koordenasaun hanesan grupu no grupu traballu; no
Envolve sira bainhira organiza avaliasaun, treinamentu ka diskusaun foku grupu, ezemplu bainhira diskute problema sira hanesan prevene no responde ba violénsia bazeia ba jéneru no sexu.⁹

Apoiu kna’ar lideransa husi DPO no OPA Izemplu:

Fornese oportunidade dezenvolve kapasidade ba asaun umanitáriu ida ne’ebé inkluzivu; no
Apoiu organizasaun hirak ne’e atu halo advokasia ho autór umanitáriu hanesan governu lokál, ajénsia UN, ONG sira, ka komunidade lokál ba direitu ema idozu no ema ho defisiénsia.

Se karik laiha organizasaun ida mak reprezenta ema idozu no ema ho defisiénsia, ajuda estabelese hela. Apoiu sira atu hola parte iha prosesu foti desizaun kona-ba asaun umanitáriu no liuliu kona-ba problema ne’ebé mak afeita vida moris ema idozu no ema ho defisiénsia. No mós apoiu sira atu monitoriza, to’o iha ne’ebé ona direitu ema idozu no ema ho defisiénsia hetan ona protesaun no halo advokasia ba asaun umanitáriu ida ne’ebé mak inkluzivu liu.

Moris independente no apoiu ema seluk

Labele hanoin katak ema idozu no ema ho defisiénsia depende ba ema seluk atu asesu ba asisténsia no servisu sira. Foti medida atu adapta asisténsia no servisu sira ho maneira ne’ebé mak fasilita ema idozu no ema ho defisiénsia atu asesu ba asisténsia ho seguru ho sira nia aan rasik.

Ema idozu no ema ho defisiénsia balun sei presiza apoiu husi membru família, kuidadór ka rede apoiu. Iha kazu ida-ne’e husu sira atu identifika ema ruma ne’ebé mak sira fi’ar no sira hili ona atu ajuda sira. Garante katak sira labele separadu ka tenke hamutuk hela deit ho ema hirak ne’e.

Orientasaun ba asaun xave 3.2: Identifika, avalia no redus risku ne’ebé mak ema idozu no ema ho defisiénsia hasoru iha emerjénsia.

Envolve feto no mane ho defisiénsia no tinan ne’ebé diferente, ema idozu no sira nia organizasaun reprezentativu, bainhira monitoriza no avalia risku ne’ebé mak mosu husi krize umanitáriu, no risku sira ne’ebé mak bele rezulta husi resposta. Ezemplu, inklui ema idozu no ema ho defisiénsia iha komisaun avaliasaun komunidade.

Identifika grupu ema sira ne’ebé mak fásil liu atu hetan risku hirak ne’e. Envolve sira iha monitorizasaun no avaliasaun risku, grupu hirak ne’e bele feto ka labarik feto ho defisiénsia; ema idozu ho defisiénsia; ema idozu ka ema ho defisiénsia sira ne’ebé mak iha risku tanbá sira nia orientasaun sexuál ka identidade jéneru; ka labarik no foin-sa’e ne’ebé ho defisiénsia intelektuál no psikososiál. Kolabora ho organizasaun sira ne’ebé mak halo ona kontaktu ho sira.

Buka hatene saida deit mak ema idozu no ema ho defisiénsia bele halo atu redus risku ne’ebé mak sira hasoru iha krize umanitáriu. Ezemplu, rekruta feto ho defisiénsia sira ka feto idozu atu hasa’e konxiensia komunidade kona-ba violénsia bazeia ba jéneru.

Sistematikamente monitoriza asaun umanitariú atu garante katak asaun hirak ne’e sei la-hamosu risku no perigu seluk ba ema idozu no ema ho defisiénsia.¹⁰ Ezemplu, bainhira staff seidauk hetan sensibilizasaun ba inkluzaun, sira bele iha atitude negativu ba ema idozu no ema ho defisiénsia. Ida-ne’e bele fó risku liu ba ema idozu no ema ho defisiénsia atu hetan diskriminasaun no kontribui ba reforsa estigma iha komunidade.

Konsidera oinsá kria medida sira atu fasilita ema idozu no ema ho defisiénsia atu asesu ba asisténsia no protesaun, bele fó risku liután ba sira. Ezemplu, prioritiza sira ba asisténsia bele estigmatizá sira ka tau sira iha risku ba na’ok ka violénsia.¹¹

Planu oinsá atu redus risku hirak ne’e. Ezemplu, organiza eskema distribusaun ne’ebé seguru. Hasa’e konxiensia iha komunidade kona-ba importansia atu prioritiza ema idozu no ema ho defisiénsia ba asisténsia no protesaun.

Hasa’e konxiensia risku ba violénsia, abuzu no esploitasaun ne’ebé mak ema idozu no ema ho defisiénsia hasoru iha emerjénsia. Garante katak ema hatene risku sira ne’e dalaruma la-hanesan ba feto mane, labarik feto no labarik mane no ema ho identidade jéneru seluk. Garante katak ema hatene mekanizmu saida deit mak eziste atu relata risku no insidente sira (Haree Padraun inkluzaun ba protesaun).

Orientasaun ba asaun xave 3.3: Prioritiza seguransa no dignidade ema idozu no ema ho defisiénsia durante faze tomak husi asaun umanitáriu no evita hamosu perigu ruma.

Hare’e fila fali Ita-Boot nia planu sira atu konsidera seguransa no dignidade ema idozu no ema ho defisiénsia. Ezemplu:

Hili fatin ida ne’ebé seguru ba fasilidade no servisu sira;
Organiza atividade ho maneira sira ne’ebé mak halibur hamutuk família ka grupu apoiu sira seluk no fasilita ema sira ne’ebé mai husi suku ka rede apoiu ida atu hamutuk hela deit;
Husu ema idozu (feto no mane) no ema ho defisiénsia (feto mane, labarik feto no labarik mane) se karik sira bele asesu ba servisu ho seguru, identifika seraké Ita-Boot presiza atu halo servisu hirak ne’e seguru – ezemplu, husu se karik sira tenke halo viajen iha kalan atu to’o iha pontu distribusaun; no
Konsidera uza atividade outreach atu konsulta ho grupu sira ne’ebé mak dalaruma iha risku liu ba abuzu, hanesan ema ho defisiénsia intelektuál ka ema ne’ebé iha risku tanbá deit sira nia orientasaun sexuál ka identidade jéneru. Garante konfidensialidade iha konsultasaun no evita kontribui ba estigma hasoru grupu hirak ne’e.

Respeitu konfidensialidade bainhira Ita-Boot kolekta komentáriu ka dadus sensitivu husi ema idozu no ema ho defisiénsia.

Promove dignidade no seguransa iha organizasaun

Implementa polítika sira ne’ebé mak promove inkluzaun no prevene diskriminasaun, esploitasaun sexuál, no forma abuzu sira hotu ba ema idozu no ema ho defisiénsia, inklui abuzu finanseiru, fíziku ka abuzu psikolójiku no neglijénsia (abandona). Se karik nesesáriu, dezenvolve polítika foun ka adapta polítika atuál.

Treinu staff no parseiru sira atu:

Promove seguransa no proteje dignidade ema idozu no ema ho defisiénsia;
Prevene diskriminasaun kontra ema idozu no ema ho defisiénsia;
Identifika ho seguru ema ne’ebé mak esperiénsia ona violénsia, abuzu ka esploitasaun no refere sira ba ajénsia jestaun kazu ne’ebé mak apropriadu;
Rekoñese risku ne’ebé mak aumenta ba grupu balun – ezemplu, labarik feto no feto ho defisiénsia sira hotu no feto idozu, bele iha risku liu ba esploitasaun sexuál no abuzu inklui husi traballadór umanitáriu rasik; no
Promove imajen ne’ebé pozitivu kona-ba ema idozu no ema ho defisiénsia iha materiál komunikasaun.

Instrumentu no rekursu sira

Global Protection Cluster Protection Mainstreaming Toolkit: field testing version, Global Protection Cluster 2017, http://bit.ly/2kFlRgJ

Inter-Agency Standing Committee, Minimum Operating Standards: Protection from Sexual Exploitation and Abuse by own Personnel (MOS-PSEA), Inter-Agency Standing Committee, 2016, http://bit.ly/2oIUs2L (18 December 2017)

Estudu kazu

Liga prepasaun, resposta no reziliénsia

Christian Aid servisu fó apoiu ba komunidade atu sai reziliénte liu ba dezastre sira. Ninia métodu servisu mak fó apoiu ba komunidade no indivídu, empodera sira atu identifika no manejia risku sira ne’ebé mak relevante ba sira nia situasaun moris, atu nune’e sira bele responde ba ataka no dezastre ruma. Ida-ne’e inklui, ezemplu hatama aplikasaun ba subsídiu mikro bazeia ba grupu ka husu apoiu ba dezenvolvimentu abilidade sira.

Hafoin hahu servisu ba inkluzaun no identifika katak ema idozu no ema ho defisiénsia regularmente la-inklui iha sira nia programa reziliénsia, Christian Aid hahu introdus instrumentu no treinamentu abilidade sira atu haforsa liután sira nia métodu.

Christian Aid uza oportunidade husi programa pílotu iha Filipina, Mianmar no Kenya, iha ne’ebé sira servisu atu liga lakuna entre preparasaun, resposta no reziliénsia no introdus instrumentu ba inkluzaun. Ezemplu, ho ajuda instrumentu komunikasaun, halo ona treinamentu ba ekipa sira kona-ba oinsá atu koalia no rona ema idozu no ema ho defisiénsia ho respeitu no enkoraja sira nia partisipasaun iha atividade sira.

Liuhusi habelar sira nia métodu atu inklui ema idozu no ema ho defisiénsia, fasilita ona sira hodi alkansa no komunika ho membru komunidade oi-oin; ema idozu no ema ho defisiénsia iha ona pozisaun ida ne’ebé di’ak atu hola parte iha programa mobilizasaun komunidade no bele forma parte aplikasaun ba subsídiu no dezenvolvimentu abilidade sira.

Christian Aid identifika katak inisiativa sira neebé mak lidera husi feto, partikularmente husi feto idozu, hahu mosu atu responde ba nesesidade protesaun no psikososiál iha sira nia komunidade. Liuhusi servisu programa atuál no introdus instrumentu komunikasaun, Christian Aid diretamente bele influénsia programa atu ba too iha ema hirak neebé iha risku liu.

Fontes: Christian Aid UK

Padraun prinsipál ba Inkluzaun 4: Koñesimentu no partisipasaun

Ema idozu no ema ho defisiénsia hatene sira nia direitu no partisipa iha desizaun sira ne’ebé mak afeita sira nia moris.

Asaun xave

4.1:
Fornese informasaun ida ne’ebé asesível kona-ba direitu.
4.2:
Promove partisipasaun ida ne’ebé signifikativu ba ema idozu no ema ho defisiénsia iha foti desizaun.

Nota orientasaun

Orientasaun ba asaun xave 4.1: Fornese informasaun asesível kona-ba direitu.

Identifika ema ne’ebé mak bele ajuda Ita-Boot fahe informasaun kona-ba direitu sira ho maneira ida ne’ebé asesível hanesan DPO, OPA organizasaun komunitáriu ka lidér komunitáriu. Envolve organizasaun sira ne’ebé mak reprezenta grupu sira ne’ebé iha risku liu. Iha situasaun balun, bele labarik feto feto ho defisiénsia no feto idozu no mós ema ne’ebé iha risku tanbá sira nia orientasaun sexuál ka identidade jéneru.

Envolve grupu ema idozu oioin, ema ho defisiénsia no sira nia organizasaun reprezentativu bainhira dezeñu no fahe informasaun kona-ba sira nia direitu. Inklui feto labarik no foin- sa’e ho defisiénsia ema ho defisiénsia intelektuál no ema idozu ho defisiénsia atu garante katak Ita-Boot nia mensajen to’o iha grupu hirak ne’e.

Foti husi estrutura jurídiku nasionál no/ka internasionál atu dezenvolve mensajen kona-ba sira nia direitu. Ida-ne’e bele mai husi Konvensaun kona-ba Direitu ba Ema ho Defisiénsia sira, no/ ka lei ka polítika nasionál kona-ba inkluzaun ema idozu no ema ho defisiénsia.

Bainhira fornese informasaun:

Garante katak informasaun ne’e fásil atu lee no komprende;
Uza formatu no kanál komunikasaun oioin (Haree Padraun prinspál ba Inkluzaun 2, Nota orientasaun kona-ba barreira ba informasaun);
Koalia diretamente ho ema idozu no ema ho defisiénsia, la’ós ba ema ne’ebé mak akompaña sira; no
Uza termu atu deskreve ema idozu no ema ho defisiénsia ne’ebé mak la halo estigmasaun ba sira (Haree Box 5 iha karaik ne’e ‘Terminolojia’). servisu ho DPO no OPA atu hili termu ida ne’ebé di’ak liu hodi uza.

Bainhira monitoriza no avalia Ita-Boot nia programa, avalia oinsá efikásia husi Ita-Boot nia komunikasaun. Avalia mudansa sira iha konxiensia ema idozu no ema ho defisiénsia kona-ba sira nia direitu.

Labele hanoin katak métodu komunikasaun partikulár ida deit mak adekuadu ba grupu espesífiku ida. Ezemplu, la’ós ema hotu ne’ebé mak ho defisiénsia tilun ka susar atu rona, bele uza lian jestuál ka lee La’ós ema hotu ne’ebé ho defisiénsia matan bele uza Braille Mezmu iha área sira ne’ebé mak ho taxa literasia ne’ebé aas, abilidade literasia dalaruma la-hanesan no dalaruma ki’ik liu iha grupu idozu sira.

Konsentimentu informadu

Konsentimentu informadu mak permisaun ida ne’ebé ema ida fó bazeia ba informasaun ida ne’ebé ezatu ne’ebé mak sira hatene di’ak ona.

Fornese informasaun ne’ebé fásil ba ema idozu no ema ho defisiénsia atu komprende atu nune’e sira bele deside rasik atu konkorda (ka la-konkorda) ho asaun sira ne’ebé mak afeita sira nia moris.

Bainhira Ita-Boot entrevista ema idozu no ema ho defisiénsia, fó atensaun partikulár atu mantein konfidensialidade no proteje sira nia privasidade. Iha kazu bainhira ema idozu no ema ho defisiénsia presiza apoiu husi ema seluk hanesan membru família ka kuidadór ida-ne’e signifika garante entrevista privadu husi pesoál ne’e.

Apoiu direitu ema idozu no ema ho defisiénsia atu sira rasik bele foti desizaun ne’ebé informadu. Ezemplu, uza komunikasaun alternativu (Haree Glósariu) ka interpretasaun lian jestuál.

Orientasaun ba asaun xave 4.2: Promove partisipasaun signifikativu ba ema idozu no ema ho defisiénsia iha foti desizaun.

Serbisu ho ema idozu no ema ho defisiénsia no sira nia organizasaun reprezentativu atu identifika no hasai barreira sira ne’ebé mak bele prevene sira husi partisipasaun iha foti desizaun. Dezenvolve sira nia kapasidade bainhira presiza atu apoiu sira nia partisipasaun tomak.

Sensibiliza komunidade no organizasaun sira seluk kona-ba direitu ema idozu no ema ho defisiénsia atu partisipa iha foti desizaun ne’ebé mak afeita sira.

Monitoriza oinsá ema idozu (feto no mane) no ema ho tipu defisiénsia ne’ebé diferente (feto mane, labarik feto no labarik mane) hola parte iha foti desizaun.

Partisipasaun signifikativu iha enkontru sira

Organiza enkontru no konsultasaun ne’ebé permite ema idozu no ema ho defisiénsia atu partisipa iha prosesu tomak.

Ezemplu:

Planu enkontru ho ema idozu no ema ho defisiénsia no sira nia organizasaun reprezentativu;
Garante diversidade no balansu jéneru entre partisipante sira no iha ekipa organiza enkontru;
Se karik nesesáriu, organiza enkontru ho grupu balun deit, se karik liuhusi dalan ida ne’e sira bele partisipa di’ak liu – ezemplu, konsidera organiza enkontru ho feto deit se karik Ita-Boot hatene katak feto sira sei sente la- konfortável iha grupu ne’ebé kahur ho mane;
Konvida ema ho tipu defisiénsia oioin; apoiu ema ne’ebé mak dalaruma hasoru barreira ba komunikasaun atu partisipa iha prosesu tomak hanesan ema ho defisiénsia tilun ka susar atu rona, ka ema ho defisiénsia intelektuál no psikososiál;
Garante fatin ne’e asesível: vizita uluk fatin ho reprezentativu lokál DPO no OPA lokál, husu sira atu espesífika barreira ba partisipasaun tomak (Haree padraun prinsipál ba inkluzaun 1, Asaun xave 1.1, Nota orientasaun kona-ba dadus barreira no fasilitasaun), adapta fatin bainhira nesesáriu no uza oportunidade atu hasae konxiensia husi fatin nain kona-ba barreira hirak ne’e no direitu ema idozu no ema ho defisiénsia;
Fornese informasaun molok, durante no hafoin enkontru iha formatu ne’ebé diferente; no
Se karik ema idozu no ema ho defisiénsia ruma presiza ema ida atu akompaña sira, halo provizaun ba ema ida-ne’e – ezemplu, fornese espasu balun no/ka osan transporte ba ema ida-ne’e.

Instrumentu no rekursu sira

Enkontru no konsultasaun sira

CBM, Tool: Accessible meetings or events, CBM, http://bit.ly/2BFBu23 (18 December 2017)

Atitude

CBM, Humanitarian Hands-on Tool (HHoT), Attitude task card, CBM, http://bit.ly/2oIV6gH (18 December 2017)

Terminolojia

United Nations Children’s Fund (UNICEF), General Guidance: Including children with disabilities in humanitarian action, UNICEF, 2017, p82, http://bit.ly/2zjrqtJ

Informasaun

Inclusion Europe, Information for all: European standards for making information easy to read and understand, Brussels, Inclusion Europe, 2009, http://bit.ly/2CWSE9e

W3C Web Accessibility Initiative, Web Content Accessibility Guidelines, WCAG, published 2005, updated 2017, http://bit.ly/26rBb27 (15 December 2017)

Partisipasaun

CBM, Active Participation: Key to Inclusion: Testimonies from Humanitarian Workers with Disabilities, CBM, 2016, http://bit.ly/2kdLs0w

HelpAge International, Older people in community development: The role of older people’s associations (OPAs) in enhancing local development, HelpAge International, 2009, http://bit.ly/2kczch1

Box 5

Terminolojia

Lian ne’ebé Ita-Boot uza atu deskreve ema, importante tebes. Lian ne’e rasik bele empodera ka diskrimina sira. Uza lian ne’ebé lalós, bele haforsa estereótipu. Atu deskreve ema idozu no ema ho defisiénsia:

Uza terminolojia ema mak uluk: uza ema mak uluk, hafoin defisiénsia – ezemplu: “ema ho defisiénsia”, la’ós “ema defisiénsia”, ka “defisiénsia”;
Uza “ema idozu”, la’ós “ema idade” ka “idade”;
Evita termus ne’ebé mak tuan ona ka haforsa estigma, hanesan “defisiénte”, “terus-na’in” no “vítima”; uza “uzadór kadeira roda”, la’ós “kadeira roda ne’ebé kesi metin” ka “depende ba kadeira roda”;
Evita uza sigla hodi refere ba ema – ezemplu, uza“ema ho defisiénsia” (la’ós EHD), “labarik ho defisiénsia” (la’ós LHD), ka “ema idozu” (la’ós EI);
Uza “ema ka pesoál sein defisiénsia”, la’ós “normál” ka “regulár” ema; no
Uza “ema ho defisiénsia tilun ka susar atu rona”, la’ós “ema ho problema tilun”.

Estudu kazu

Harii kampu refujiadu ida ne’ebé inkluzivu iha Haiti

Hafoin rai-nakdoko 2010 iha Port Au Prince Haiti, ema millaun rua mak sai refujiadu. Ida-ne’e inklui refujiadu ho defisiénsia, liu-liu ema ho defisiénsia tilun no ema ne’ebé tilun susar atu rona.

Iha tempu krize asesu ba informasaun no komunikasaun limitadu tebes. Ho sistema komunikasaun ne’ebé mak laiha fatin, ema ho defisiénsia tilun mak hanesan ema ne’ebé ikus liu atu hetan informasaun kona-ba aihan, bee hela fatin no nesesidade báziku sira seluk Menus komprénsaun kona-ba ema nia saúde nesesidade no kapasidade sira, bele mós mosu.

International Deaf Emergency (IDE) mak organizasaun ida ne’ebé dirije husi no ba ema ho defisiénsia, servisu iha Port Au Prince atu redus barreira hirak ne’e Sira relata estatutu no atualiza notisia uza lian jestuál. Ba ema hirak ne’ebé mak labele uza lian jestuál, sira fornese instrumentu nesesáriu atu aprende Hadi’ak mós kondisaun fíziku atu fasilita komunikasaun hanesan fornese lampu solár painel iha estrada kampu refujiadu atu fasilita ema ho defisiénsia tilun atu komunika ba malu iha tempu kalan.

Aleinde intervensaun komunikasaun hirak ne’e IDE mós ajuda garante katak ema ho defisiénsia inklui mós iha intervensaun sira seluk liuhusi fornese rekursu no rede servisu. Ezemplu, ho konvite husi organizasaun ne’ebé mak atende ema ho defisiénsia tilun, IDE lori ema ho defisiénsia tilun profesionál ne’ebé mak hetan ona treinamentu iha prearasaun no asisténsia emerjénsia, nutrisaun no saúde, edukasaun inkluzivu, direitu umanu, formasaun servisu no área relevante sira seluk atu fornese servisu. Sira mós ajuda kria oportunidade ba ema ho defisiénsia tilun atu uza sira nia kapasidade durante faze rekuperasaun hanesan harii hela fatin, hili-ai no distribui instrumentu dezenvolvimentu negósiu ki’ik ba família sira.

Liuhusi IDE nia intervensaun, ema ho defisiénsia iha resposta Haiti bele hetan informasaun di’ak liu kona- ba situasaun refere komunika sira nia nesesidade no kapasidade, no partisipa iha esforsu rekonstrusaun.

Fontes: komunikasaun eskrita, International Deaf Emergency.

Padraun Prinsipál ba Inkluzaun 5: Komentáriu no keixa sira

Ema idozu no ema ho defisiénsia iha asesu ba komentáriu ne’ebé responsivu no seguru no mekanizmu hato’o keixa sira.

Asaun xave

5.1:
Kria mekanizmu hato’o komentáriu no keixa ne’ebé mak fásil atu komprende no asesível ba ema idozu no ema ho defisiénsia.
5.2:
Foti asaun bazeia ba komentáriu no keixa husi ema idozu no ema ho defisiénsia ho maneira ida ne’ebé mak respeitu sira nia direitu, dignidade no seguransa.

Nota orientasaun

Orientasaun ba asaun xave 5.1: Kria mekanizmu hato’o komentáriu no keixa ne’ebé mak fásil atu komprende no asesível ba ema idozu no ema ho defisiénsia.

Husu ema idozu no ema ho defisiénsia, saida mak sira sente seguru no apropriadu liu ba sira atu hato’o komentáriu no keixa sira.

Bainhira kria mekanizmu hato’o komentáriu no keixa sira:

Planu no orsamenta formatu informasaun no kanál komunikasaun ne’ebé diferente (Haree padraun prinsipál ba inkluzaun 2, Nota orientasaun kona-ba barreira ba informasaun) – ida-ne’e inklui uza lian ne’ebé simples no formuláriu komentáriu ne’ebé fásil atu uza; no
Apoiu ema idozu no ema ho defisiénsia atu hatama sira nia komentáriu no keixa sira; alternativamente se karik ema idozu no ema ho defisiénsia presiza no autoriza ema ruma atu halo ida-ne’e permite sira atu nomeia ema seluk hanesan kuidadór asistente pesoál ka membru família atu hatama sira nia komentáriu ka keixa hodi sira nia naran.

Informa ba ema idozu no ema ho defisiénsia kona-ba objetivu husi mekanizmu hato’o komentáriu no keixa no esplika oinsá ninia lalaok. Ezemplu:

Hasa’e konxiensia kona-ba sira nia direitu atu hato’o keixa no hatama sira nia komentáriu ho kondisaun iguál hanesan ema seluk;
Esplika saida mak sira bele hetan husi organizasaun umanitáriu;
Esplika problema saida mak sira bele ka labele rezolve liuhusi mekanizmu hato’o komentáriu no keixa;
Esplika oinsá sira bele hato’o sira nia komentáriu no keixa, no oinsá komentáriu no keixa sei prosesa.

Orientasaun ba asaun xave 5.2: Foti asaun bazeia ba komentáriu no keixa husi ema idozu no ema ho defisiénsia ho maneira ida ne’ebé mak respeitu sira nia direitu, dignidade no seguransa.

Trata keixa sira hanesan parte ida husi kultura organizasaun ne’ebé mak respeitu dignidade direitu no kapasidade ema idozu no ema ho defisiénsia.

Kumpre polítika organizasaun ne’ebé mak rekoñese no respeitu direitu ema idozu no ema ho defisiénsia. Halo mudansa ba polítika organizasaun se karik polítika hirak ne’e la-inkluzivu ba grupu hirak ne’e.

Halo staff sira hatene katak ema idozu no ema ho defisiénsia iha direitu iguál hanesan ema seluk atu hato’o sira nia komentáriu no keixa sira.

Treinu staff sira atu apoiu ema idozu no ema ho defisiénsia atu hatama sira nia komentáriu no keixa sira ho seguru. Treinu sira atu:

Mantein konfidensialidade: fahe deit informasaun ho membru família, kuidadór ka ema seluk ho autorizasaun husi ema idozu ka ema ho defisiénsia no evita fahe informasaun detalla pesoál;
Kolekta informasaun husi ema idozu no ema ho defisiénsia, dokumenta no konfirma sira nia esperiénsia ho maneira objetivu no sein julgamentu – ezemplu, esperiénsia husi ema idozu no ema ho defisiénsia balun hanesan labarik ka ema ho defisiénsia intelektuál, dalaruma ema hanoin ladún loos ka ladún fi’ar;
Refere no identifika ho seguru ema idozu no ema ho defisiénsia ne’ebé mak relata violénsia, abuzu no esploitasaun; ida-ne’e bele ajuda sira atu hetan kuidadus no apoiu ne’ebé mak apropriadu no evita perigu sira seluk ne’ebé bele mosu (haree Padraun inkluzaun ba protesaun 2); no
Kumpre padraun prosedimentu ba protesaun bainhira ema idozu ka ema ho defisiénsia ida hato’o keixa kona-ba violénsia, abuzu ka esploitasaun ne’ebé mak halo husi autór umanitáriu.

Ajusta Ita-Boot nia programa hodi hatán ba komentáriu ne’ebé mak Ita-Boot simu.

Fahe komentáriu no keixa sira ho parseiru nasionál no internasionál ne’ebé mak envolve iha asaun umanitáriu, respeitu konfidensialidade no privasidade ema idozu no ema ho defisiénsia ne’ebé mak hatama ona sira nia komentáriu.

Konvida ema idozu no ema ho defisiénsia sira atu fó sira nia komentáriu ba Ita-Boot nia revizaun no aprova adaptasaun sira ne’ebé mak Ita-Boot halo ona ba iha programa.

Estudu Kazu

Balkaun atendementu iha Kenya

Severe drought in Turkana, northern Kenya, has led to food Bailoron naruk iha Turkana, norte Kenya, hamosu ona aihan ne’ebé menus iha komunidade agríkola no pastorál. Ema idozu, labarik no ema ho defisiénsia iha risku.

HelpAge International distibui ona subsídiu osan kas ba uma-kain 3,000 ho ema tinan 60 ba leten iha área 9, atu nune’e sira bele troka animál sira ne’ebé mak lakon ona, hahu negósiu ki’ik no hola sasán esensiál sira.

HelpAge estabelese ona “komisaun balkaun atendementu” iha kada área atu fasilita ema atu komenta ka hato’o keixa kona-ba projetu ne’e. Kada komisaun iha ema feto 2 no mane 2 (atu enkoraja feto ne’ebé mak normalmente ladún iha oportunidade atu koalia, atu hakat ba oin). Membru komisaun inklui ema idozu no foin-sa’e atu iha benefisiu ba koñesimentu no abilidade ne’ebé oioin.

HelpAge introduz idea balkaun atendementu ba lidér komunitáriu iha kada área. Lidér sira organiza enkontru nakloke iha ne’ebé staff HelpAge esplika sira nia kna’ar no responsabilidade husi balkaun atendementu no eleitu ona membru komisaun.

Meja atendementu públika liuhusi enkontru komunidade no durante distribusaun osan kas. Voluntáriu sira mak responsabiliza ba maioria pergunta no keixa sira, hanesan pergunta kona-ba se mak elejível no menus idenfikasaun atu prova elejibilidade.

Meja atendementu halo ona mudansa ba projetu, hanesan garante ema neebé merese mak simu subsídiu no mudansa husi regulár, transferénsia osan kas ho montante kiik ba montante boot, hanesan resposta ida husi resipiente sira.

Fontes: Njuguna, I. ‘Help desks in Kenya’ Ageways. Practical issues in ageing and development, Issue 82, March 2014, p16 (edited), http://bit.ly/2yRU69J

Padraun Prinsipál ba Inkluzaun 6: Koordenasaun

Ema idozu no ema ho defisiénsia asesu no partisipa iha asisténsia umanitáriu ne’ebé mak koordenadu no kompleta malu.

Asaun xave

6.1:
Garante katak mekanizmu koordenasaun entre ajénsia reprezentativu ba ema idozu no ema ho defisiénsia no asesível ba sira.
6.2:
Mekanizmu koordenasaun entre ajénsia regularmente responde ba inkluzaun ema idozu no ema ho defisiénsia.

Nota orientasaun

Orientasaun ba asaun xave 6.1: Garante katak mekanizmu koordenasaun entre ajénsia reprezentativu ba ema idozu no ema ho defisiénsia, no asesível ba sira.

Apoiu ema idozu, ema ho defisiénsia no sira nia organizasaun reprezentativu atu partisipa signifikativu iha mekanizmu koordenasaun entre ajénsia, inklui enkontru no grupu traballu. Ezemplu:

Organiza enkontru preparatóriu ho grupu ema idozu, ema ho defisiénsia no sira nia organizasaun reprezentativu; iha enkontru ne’e esplika oinsá lalaok servisu husi mekanizmu koordenasaun, oinsá sira bele partisipa no saida mak sira nia espetativa;
Apoiu grupu hirak ne’e atu halo planu oinsá sira sei kontribui idea ba enkontru koordenasaun; no
Envolve feto no mane ho iguál. Envolve ema ho tipu defisiénsia oioin, inklui ema ho saúde mentál ka defisiénsia intelektuál. Ezemplu, kria grupu apoiu ne’ebé iha balansu jéneru atu garante katak grupu sira hotu reprezentativu.

Hasa’e konxiensia ema ne’ebé mak responsabiliza atu dezenvolve mekanizmu koordenasaun kona-ba direitu ema idozu no ema ho defisiénsia atu envolve iha sira nia dezenvolvimentu.

Bainhira organiza enkontru:

Hili fatin ne’ebé mak asesível;
Fornese informasaun iha formatu ne’ebé asesível (Haree padraun prinsipál ba inkluzaun 4, asaun xave 4.1, Nota orientasaun kona-ba fornese informasaun ne’ebé mak asesível); no
Fornese akomodasaun razoável atu permite ema hotu partisipa ho másimu – ezemplu, fornese interpretasaun lian jestuál ne’ebé mak hetan ona sertifikasaun no/ka asisténsia textu direta.

Monitoriza partisipasaun ema idozu no ema ho defisiénsia iha mekanizmu koordenasaun. Ida-ne’e inklui reve balansu jéneru no oinsá ema ho tipu defisiénsia oioin reprezenta ho di’ak.

Orientasaun ba asaun xave 6.2: Iha mekanizmu koordenasaun entre ajénsia, regularmente responde ba inkluzaun ema idozu no ema ho defisiénsia.

Defini oinsá problema ne’ebé mak relasiona ho inkluzaun ema idozu no ema ho defisiénsia sei bele rezolve no identifika kna’ar no responsabilidade sira.

Pontu fokál no grupu traballu

Identifika pontu fokál ida ka kria grupu traballu ida atu koordena medida atu inklui ema idozu no ema ho defisiénsia nia estratéjia no planu servisu husi mekanizmu koordenasaun.

Se karik pontu fokál ka grupu traballu eziste ona, garante katak sira preparadu atu halo serbisu iha mekanizmu koordenasaun. Se karik laiha pontu fokál ka grupu traballu, ajuda kria ida.

Apoiu pontu fokál ka grupu traballu atu hetan rekursu sira hodi dezenvolve sira nia koñesimentu no abilidade kona-ba inkluzaun.

Liga pontu fokál ka grupu traballu ho pontu fokál ka grupu traballu serbisu iha área transversál sira seluk hanesan integrasaun jéneru ka protesaun. Ho ida-ne’e sira bele kompleta malu.

Ita-Boot bele aloka serbisu tuir-mai ne’e ba pontu fokál ka grupu traballu:

Sistematikamente responde ba problema sira relasiona ho ema idozu no ema ho defisiénsia hanesan parte ida husi ajenda mekanizmu koordenasaun – posível pontu entrada bele hatama ba iha ajenda integrasaun protesaun;¹²
Inklui komponente inkluzaun iha termu referénsia sira, nota konseptuál no proposta orsamentu, planu no avaliasaun nesesidade hanesan orsamentu ba akomodasaun razoável no servisu asesível;
Fornese apoiu tékniku ka ligasaun orientasaun kona-ba oinsá atu kolekta no análiza dadus dezagregadu husi sexu, tinan no defisiénsia;
Apoiu pontu fokál ka grupu traballu atu halo mapamentu no avalia ema idozu no ema ho defisiénsia sira nia rekursu no koñesimentu kona-ba inkluzaun; no
Kontribui hodi monitoriza no avalia atividade sira atu haree oinsá inkluzaun ba ema idozu no ema ho defisiénsia, hetan ona resposta.

Tenke hanoin: pontu fokál ka grupu traballu la’ós responsável úniku atu inklui ema idozu no ema ho defisiénsia iha mekanizmu koordenasaun. Ema hotu ne’ebé mak envolve iha asaun umanitáriu fahe responsabilidade serbisu ida-ne’e.

Mekanizmu referál

Estabelese sistema atu refere problema ne’ebé mak relasiona ho inkluzaun ema idozu no ema ho defisiénsia ba iha autór umanitáriu ne’ebé lolós, fornesedór servisu, DPO no OPA.

Bainhira Ita-Boot halo mapamentu ba servisu umanitáriu:

Inklui organizasaun sira ne’ebé mak fornese asisténsia ka iha esperiénsia servisu inkluzaun ba ema idozu no ema ho defisiénsia – ezemplu, inklui liña ministériu ka departamentu, DPO, OPA organizasaun espesialista, ka edukasaun ka fornesedór servisu saúde sira;
Avalia servisu hirak ne’e asesível no koordenadu ona ka lae – se karik presiza, sensibiliza fornesedór servisu sira atu halo servisu hirak ne’e asesível no inkluzivu liután; no
Fahe Ita-Boot nia informasaun mapamentu ho organizasaun relevante sira hotu inklui hirak ne’ebé mak responsável ba mekanizmu koordenasaun.

Identifika servisu sira ne’ebé mak la-asesível ba ema idozu no ema ho defisiénsia. Rekomenda oinsá atu halo servisu hirak ne’e asesível.¹³

Fó konsellu ba órgaun koordenasaun kona-ba oinsá dezagrega dadus husi sexu, tinan no defisiénsia. Esplika oinsá informasaun kona-ba barreira ne’ebé mak ema idozu no ema ho defisiénsia sira hasoru, bele uza atu halo planu ida ba resposta ne’ebé mak koordenadu.

Sensibiliza staff sira ne’ebé mak servisu iha koordenasaun no mekanizmu referál iha área igualdade jéneru no inkluzaun ema idozu no ema ho defisiénsia sira (Haree padraun prinsipál ba inkluzaun 8, (Nota orientasaun kona-ba dezenvolvimentu kapasidade staff seksaun sensibilizasaun).

Garante katak ema idozu no ema ho defisiénsia sira bele uza mekanizmu referál. Ezemplu fornese informasaun kona-ba mekanizmu referál iha format oioin, ka fornese osan transporte, se karik presiza.

Estudu kazu

Forsa-tarefa ba idozu no defisiénsia durante resposta ba anin-boot (tufaun) iha Haiyan

Anin-boot (tufaun) iha Haiyan (Yolanda) ataka ema Filipina sira iha Novembru 2013. Hanesan parte ida husi resposta emerjénsia, liuhusi Grupu Protesaun kria ona Forsa-tarefa ba Ema Idozu no Ema ho Defisiénsia (ADTF). Relatóriu inisiu kona-ba ema ho defisiénsia sira ne’ebé mak afeitadu husi dezastre ladún kompletu no detalla. ADTF ninia servisu dahuluk mak atu garante katak koleksaun dadus konsistente no refleta duni ba problema relasiona ho tinan, jéneru no defisiénsia. Ho parseria ho Grupu Saúde, halo ona mapamentu ba ema ho defisiénsia sira atu estabelese mekanizmu referál. ADTF ninia servisu seluk mak atu dezenvolve kapasidade organizaun tradisionál sira atu inklui kestaun idozu no defisiénsia iha sira nia resposta. Ida-ne’e inklui treinamentu no apoiu tékniku.

Halo ona teste ba métodu hanesan iha fatin seluk liuliu iha Pakistaun, ne’ebé ADTF estabelese hafoin inundasaun iha tinan-2010 no iha membru organizasaun 10 (lokál no internasionál).^*

*

Relatóriu no livru rekursu husi ADTF iha Pakistaun, públika iha tinan-2011. Haree http://www.cbm.org/article/downloads/54741/ADTF˙Report.pdf.

Fontes: International Federation of Red Cross and Red Crescent Societies, All Under One Roof, Disabilityinclusive shelter and settlements in emergencies, Geneva, IFRC, 2015, http://bit.ly/2Bt4FCZ

Padraun prinsipál ba Inkluzaun 7: Aprendijazen

Organizasaun kolekta no aplika aprendijazen atu fornese asisténsia ida ne’ebé inkluzivu liután.

Asaun xave

7.1:
Identifika no dokumenta aprendijazen dezafiu no oportunidade atu inklui ema idozu no ema ho defisiénsia iha asaun umanitáriu.
7.2:
Uza aprendijazen atu hadi’ak maneira oinsá Ita-Boot fornese asisténsia umanitáriu ida ne’ebé inkluzivu.
7.3:
Fahe aprendijazen prátika ne’ebé di’ak no inovasaun, tantu iha Ita-Boot nia organizaun no ho organizasaun sira seluk, hanesan projetu nia parseiru, organizasaun nasionál no autoridade sira.

Nota orientasaun

Orientasaun ba asaun xave 7.1: Identifika no dokumenta aprendijazen, dezafiu no oportunidade atu inklui ema idozu no ema ho defisiénsia iha asaun umanitáriu.

Dokumenta la’ós de’it susesu sira, maibé mós dezafiu no fallansu sira, tanbá Ita-Boot sei aprende lisaun di’ak husi dezafiu no fallansu hirak ne’e Envolve ema idozu no ema ho defisiénsia bainhira kolekta aprendijazen. Dokumenta sira nia esperiénsia no mekanizmu inovativu atu rezolve barreira asesu ba servisu no partisipasaun iha resposta emerjénsia.

Garante katak kritériu partisipasaun iha ekipa monitorizasaun no avaliasaun inklui esperiénsia serbisu iha inkluzaun, liuliu relasiona ho tinan ho defisiénsia.

Uza métodolojia no instrumentu asesibilidade atu dokumenta aprendijazen.

Husu ema idozu no ema ho defisiénsia atu reve Ita-Boot nia relatóriu hodi garante katak sira nia esperiénsia refleta ona iha relatóriu ne’e.

Orientasaun ba asaun xave 7.2: Uza aprendijazen atu hadi’ak maneira oinsá Ita-Boot fornese asisténsia umanitáriu ida ne’ebé inkluzivu.

Uza aprendijazen hodi halo rekomendasaun ba projetu atuál no futuru.

Regularmente atualiza Ita-Boot nia organizasaun ninia instrumentu sira (inklui instrumentu treinamentu) no polítika sira atu responde ba saida mak Ita-Boot aprende ona.

Diskute ho ema idozu no ema ho defisiénsia oinsá atu rezolve dezafiu no fallansu sira, no dezenvolve prátika ne’ebé di’ak

Orientasaun ba asaun xave 7.3: Fahe aprendijazen prátika ne’ebé di’ak no inovasaun tantu iha Ita- Boot nia organizaun no ho organizasaun sira seluk, hanesan projetu nia parseiru, organizasaun nasionál no autoridade sira.

Fahe lisaun aprendida no prátika ne’ebé di’ak ho belun sira iha Ita-Boot nia organizaun. Halo advokasia ba mudansa iha sistema organizasaun ka prosesu sira ne’ebé mak apoiu inkluzaun ema idozu no ema ho defisiénsia.

Uza plataforma troka dadus globál atu fahe lisaun aprendida. Ezemplu, konsidera Humanitarian Data Exchange plataforma ida ne’ebé nakloke ba públiku atu fahe dadus ne’ebé mak promove husi Eskritóriu Nasoens Unidos ba Asuntu Koordenasaun Umanitáriu (OCHA).

Fahe lisaun aprendida no prátika ne’ebé di’ak ho komunidade sira ne’ebé mak afeitadu husi krize inklui ema idozu no ema ho defisiénsia, atu garante katak Ita-Boot nia konkluzaun sira refleta duni sira nia hanoin.

No mós fahe lisaun aprendida ho projetu nia parseiru no ajénsia sira ne’ebé mak koordena mekanizmu resposta atu kontribui ba aprendijazen ida ne’ebé boot.

Instrumentu no rekursu sira

Kolekta aprendijazen

Women’s Refugee Commission and International Rescue Committee, Building Capacity for Disability Inclusion in Gender-Based Violence Programming in Humanitarian Settings: Tool 12: Documenting “Stories of Change”, Women’s Refugee Commission, http://bit.ly/2BsUEpq

Fahe aprendijazen

Humanitarian Data Exchange https://data.humdata.org

Estudu Kazu

Aplika aprendijazen atu fornese resposta ida ne’ebé inkluzivu liu.

Akordu ida iha tinan-2009 entre Concern Worldwide no USAID nia Esktritóriu ba Asisténsia Dezastre Estranjéiru estabele ona mekanizmu fundus ida hanaran Resposta ba Pakistaun ninia Refujiadu Interna (RAPID). Concern Worldwide Pakistaun aplika ona prátika sira ne’ebé ajuda inklui ema idozu no ema ho defisiénsia tanbá sira responde ba emerjénsia ho eskalaun ki’ik iha Pakistaun liuhusi fundus RAPID.

Durante inisiu resposta RAPID iha tinan-2015, uza ona oportunidade atu kolekta dadus dezagregadu husi sexu, tinan no defisiénsia. Maibé populasaun suku laran preokupa kona-ba fahe informasaun relasiona ho defisiénsia, tanbá tabú (lulik) no sentimentu mo’e iha asuntu ne’e.

Durante resposta RAPID ba daruak, komunidade partisipa iha diskusaun kona-ba prosesu koleksaun dadus no dadus ne’e atu uza ba saida. Ekipa mós halo ona revizaun ba kritériu selesaun ba benefisiáriu atu garante katak grupu sira ne’ebé mak iha potensia boot ba eskluzaun, hetan ona prioritizasaun durante avaliasaun ne’e Daudaun ne’e komunidade relata katak sira garantidu katak Concern no ninia parseiru sira interese duni atu identifika barreira ba asesu servisu sira.

Iha resposta datoluk relata ona mudansa signifikante ba inkluzaun. Ezemplu, RAPID muda ona nia métodu atu instala bomba bee manuál. Hahu iha área projetu ne’e, bomba bee manual sira hotu sei instala ho maneira ida ne’ebé asesível, no ida-ne’e sei implementa iha área projetu sira seluk.

Revizaun kona-ba fundus RAPID dokumenta katak saida mak hahu ho koleksaun dadus dezagregadu, hamosu ona resposta kompreénsivu ida ne’ebé mak dezeña ba komunidade tomak iha nia hanoin. Natureza inkluzivu husi resposta ne’e refleta ona iha prosesu envolvementu komunidade tanbá komunidade sira fornese sira nia idea no komentáriu, no diretamente influénsia projetu atu hadi’ak relevansia ba ema hirak ne’ebé mak iha risku liu.

Dokumentasaun husi ekipa resposta fó enfaze ba importansia planeamentu no rekursu ba sensibilizasaun kona-ba inkluzaun ba staff no komunidade.

Fontes: Concern Worldwide Pakistaun

Padraun prinsipál ba Inkluzaun 8: Rekursu umanu

Staff no voluntáriu sira iha atitude no abilidade ne’ebé mak adekuadu atu implementa asaun umanitáriu ne’ebé inkluzivu, no ema idozu no ema ho defisiénsia iha oportunidade iguál ba empregu no halo serbisu voluntáriu iha organizasaun umanitáriu.

Asaun xave

8.1:
Dezenvolve kapasidade staff no voluntáriu sira liuhusi hasa’e sira nia konxiensia kona-ba direitu ema idozu no ema ho defisiénsia no treinu sira atu inklui ema idozu no ema ho defisiénsia iha asaun umanitáriu.
8.2:
Implementa polítika rekursu umanu ne’ebé inkluzivu.

Nota orientasaun

Orientasaun ba asaun xave 8.1: Dezenvolve kapasidade staff no voluntáriu sira liuhusi hasa’e sira nia konxiensia kona-ba direitu ema idozu no ema ho defisiénsia no treinu sira atu inklui ema idozu no ema ho defisiénsia iha asaun umanitáriu.

Sensibilizasaun

Organiza sesaun hasa’e konxiensia ho staff no voluntáriu sira iha nivel hotu atu enkoraja muda sira nia atitude no hola parte iha inkluzaun.

Inklui sesaun kona-ba direitu ema idozu no ema ho defisiénsia no barreira ne’ebé mak sira hasoru atu partisipa iha asaun umanitáriu.

Kolabora ho ema idozu, ema ho defisiénsia no sira nia organizasaun reprezentativu atu dezeñu no implementa sesaun hirak ne’e.

Treinamentu

Dezeñu treinamentu ba staff no voluntáriu sira atu hadi’ak sira nia abilidade hodi inklui ema idozu no ema ho defisiénsia.

Abilidade tékniku relasiona ho kestaun transversál sira hanesan dezagrega dadus liuhusi sexu, tinan no defisiénsia, ka kestaun setór-espesífiku. Izemplu, staff serbisu iha programa hela fatin bele hetan treinamentu atu prevene no manejia risku violénsia no abuzu ne’ebé mak ema idozu no ema ho defisiénsia hasoru bainhira ema oferese hela fatin ba sira.

Integra módulu kona-ba inkluzaun ema idozu no ema ho defisiénsia iha Ita-Boot nia programa treinamentu ba staff.

Envolve peritu sira seluk bainhira presiza. Identifika peritu lokál, nasionál no internasionál ne’ebé mak bele ajuda Ita-Boot dezenvolve no fó treinamentu. Bele DPO OPA liña ministériu, ONG nasionál ka internasionál serbisu iha área inkluzaun ema idozu no ema ho defisiénsia ka konsultór indivídu.

Identifika oportunidade treinamentu tuir-mai ba staff no voluntáriu sira no fornese dokumentu matadalan adisionál (Haree Instrumentu no rekursu).

Orientasaun asaun xave 8.2: Implementa polítika rekursu umanu ida ne’ebé inkluzivu.

Implementa polítika organizasaun ida ne’ebé konsidera:

Medida sira atu garante remunerasaun iguál no oportunidade iguál ba serbisu ho valór iguál (hanesan prosedimentu aplikasaun serbisu no permite oráriu serbisu ne’ebé mak flexível);
Medida sira atu proteje staff no voluntáriu idozu, no staff no voluntáriu ho defisiénsia, husi diskriminasaun ka hetan abuzu tanbá sira nia jéneru, tinan no defisiénsia; no
Asesibilidade ba serbisu fatin no akomodasaun razoável (Haree padraun prinsipál ba inkluzaun 2, Nota orientasaun kona-ba hatán ba barreira sira).

Se karik Ita-Boot nia organizaun laiha polítika adekuadu iha fatin, uza polítika nasionál no internasionál ne’ebé mak relevante ba inkluzaun ema idozu no ema ho defisiénsia iha serbisu fatin. (Haree Instrumentu no rekursu sira).

Instrumentu no rekursu sira

Age and Disability Capacity Programme (ADCAP), Basic Principles of Disability Inclusion in Humanitarian Response, Cornerstone OnDemand Foundation, 2015 (available in English and Arabic at www.disasterready.org)

Age and Disability Capacity Programme (ADCAP), Comprehensive Accessible Humanitarian Assistance for Older People and People with Disabilities, Cornerstone OnDemand Foundation, 2017 (available in English and Arabic at www. disasterready.org)

Age and Disability Capacity Programme (ADCAP), Inclusion of age and disability in humanitarian action: a two-day training course:

Learner’s Workbook RedR, on behalf of the Age and Disability Consortium, 2017, http://bit.ly/2AQGVrm
Training Handbook, RedR, on behalf of the Age and Disability Consortium, 2017, http://bit.ly/2B7VcUO
Training Slideshow, RedR, on behalf of the Age and Disability Consortium, http://bit.ly/2BGD7wF

Age and Disability Capacity Programme (ADCAP), Understanding Older People and Their Needs in a Humanitarian Context, Cornerstone OnDemand Foundation, www. disasterready.org, 2015 (available in English and Arabic)

CBM, Disability-Inclusive Development Toolkit, Bensheim, CBM, 2017, http://bit.ly/2lVei5A

UN General Assembly Convention on the Rights of Persons with Disabilities (A/RES/61/106), Article 27 – Work and employment http://bit.ly/2jUp5in

Estudu kazu

Akomodasaun razoável iha servisu fatin

CBM komprometidu la’ós de’it atu implementa projetu no programa dezenvolvimentu ida ne’ebé inkluzivu no asesível maibé mós atu rekruta, mantein no dezenvolve profesionálizmu staff ho defisiénsia. Organizasaun ida-ne’e anunsia vaga serbisu inkluzivu ba ema ho defisiénsia no halo esforsu atu garante katak staff ho defisiénsia hetan akomodasaun razoável ida ne’ebé sira presiza atu hala’o sira nia serbisu. Akomodasaun razoável la’ós de’it atu kompleta preferénsia pesoál ema ho defisiénsia, ida-ne’e kona-ba fornese saida deit mak presiza atu garante katak ema ho defisiénsia bele partisipa hanesan ho ema seluk.

Diretór ekipa Aliansa no Advokasia Internasionál fó komentáriu: “CBM hatene saida mak posível no saida deit mak presiza atu halo. Ha’u tenke fó informasaun oituan ba sira kona-ba oinsá atu hetan fundus iha Bélgika atu kobre kustu sira relasiona ho akomodasaun razoável. Maibé, sira hatene kona-ba teknolojia. Ha’u presiza software screen-reader no instrumentu ida ne’ebé bele tradus konteúdu iha screen ba iha Braille.”

Staff CBM seluk simu ona apoiu no treinamentu adisionál atu fasilita nia hala’o kna’ar administrativu importante iha Gabinete Ligasaun Uniaun Europeia. Nia komenta: “Iha Bélgika, menus interpretadór ba ema ho defisiénsia tilun. Iha CBM, sira hatene ha’u-nia situasaun, no sira prontu atu ajuda ha’u, fó treinamentu no apoiu adisionál. Ida-ne’e dezenvolve ha’u-nia abilidade atu serbisu.”

Staff seluk ne’ebé sebisu nu’udar Ofisiál ba Polítika Uniaun Europeia, salienta tán katak: “Importante tebes ba prátika no polítika inkluzivu tenke estabelese uluk iha uma atu sai hanesan ezemplu ida. Emprega ema ho defisiénsia ne’ebé kompetente mak krítiku tebes. Inkluzaun ema ho defisiénsia inklui feto iha kualker nivel organizasaun, importante tebes atu hasa’e konxiensia staff CBM no ekipa jestaun kona-ba inkluzaun, atu haketak barreira interna ne’ebé mak sei dezafia partisipasaun ema ho defisiénsia no atu haforsa rikeza no diversidade forsa traballu CBM.”

Fontes: CBM, Disability Inclusive Development Toolkit, 2014

Iha tinan-2017, CBM halo ona kompromisu atu promove serbisu fatin ida ne’ebé inkluzivu iha prátika, liuhusi adopta polítika rekrutamentu inkluzivu. Atu hatene liután, haree: https://www.cbm.org/article/downloads/54741/CBM_Inclusion_Policy_Framework.pdf

Padraun prinsipál ba Inkluzaun 9: Jestaun rekursu

Ema idozu no ema ho defisiénsia sira iha espetativa katak organizasaun umanitáriu jere sira nia rekursu ho maneira ne’ebé mak promove inkluzaun.

Asaun xave

9.1:
Jere rekursu sira ho maneira ida ne’ebé mak permite ema idozu no ema ho defisiénsia sira atu iha asesu ba servisu no partisipa iha asaun umanitáriu.
9.2:
Fahe informasaun kona-ba uzu Ita-Boot nia rekursu sira ho ema idozu no ema ho defisiénsia no fornese oportunidade ba sira atu fó komentáriu.

Nota Orientasaun

Orientasaun ba asaun xave 9.1: Jere rekursu sira ho maneira ida ne’ebé mak permite ema idozu no ema ho defisiénsia sira atu iha asesu ba servisu no partisipa iha asaun umanitáriu.

Rekursu Finanseiru

Inklui item ba akomodasaun razoável no asesibilidade iha Ita- Boot nia orsamentu, hahu husi faze dezeñu programa.

Hare tuir despeza kona-ba medida sira atu inklui ema idozu no ema ho defisiénsia. Ida-ne’e sei ajuda Ita-Boot atu haree seraké orsamentu ne’ebé aloka to’o ona no uza ona tuir dalan ne’ebé los.

Sosa sasán sira

Fó prioridade atu sosa sasán, ekipamentu no fasilidade sira ne’ebé mak tuir prinsípiu dezeñu universál, tantu ba Ita-Boot nia fatin rasik no parseiru sira nian. Aplika prinsípiu ne’ebé hanesan ba prosesu sosa item aihan no item la’ós aihan.

Bainhira sosa sasán teknolojia sira atu ajuda ema ho defisiénsia, tenke koordena ho organizasaun sira seluk hanesan organizasaun komunitáriu, DPO, OPA ka fornesedór servisu lokál. Ida-ne’e bele ajuda Ita-Boot jere rekursu sira ho efikaz.¹⁴

Karik posível, sosa ekipamentu lokál.

Implementa no monitoriza polítika sira

Dezenvolve polítika jestaun rekursu inkluzivu. Adapta polítika atuál ka dezenvolve polítika foun karik presiza.

Halo auditoria ba Ita-Boot ninia organizasaun nia dezempeñu relasiona ho inkluzaun. Dezenvolve planu asaun atu hadi’ak implementasaun polítika no uzu rekursu sira.¹⁵

Adapta instrumentu programa, ezemplu koleksaun dadus, avaliasaun nesesidade ka kritériu selesaun atu fasilita Ita-Boot dezagrega dadus liuhusi sexu, tinan no defisiénsia no identifika barreira ba asesu no partisipasaun.

Dezenvolve indikadór espesífiku no fó alvu ba inkluzaun ( jéneru, tinan no defisiénsia) atu sukat dia’k ona ka lae – rekursu sira ne’ebé mak uza hodi ba to’o iha populasaun afeitadu. Ezemplu, dezenvolve indikadór kona-ba persentajen hela-fatin ne’ebé asesível, ka númeru ema idozu no ema ho defisiénsia (feto mane, labarik feto no labarik mane) ne’ebe mak asesu ba eskema distribusaun aihan.

Adopta métodu dupla (twin-track approach) atu inklui ema idozu no ema ho defisiénsia iha Ita-Boot nia serbisu. Ida-ne’e signifika organiza intervensaun espesífiku ne’ebé fó alvu ba ema idozu no ema ho defisiénsia atu apoiu sira nia inkluzaun, no integra medida sensitivu defisiénsia-no-tinan ba iha polítika no programa sira iha kualker faze.

Aloka staff ida atu halo advokasia ba ema idozu no ema ho defisiénsia atu inklui iha Ita-Boot nia organizasaun nia servisu, ezemplu iha submisaun fundus no orsamentu programa atu halo renovasaun eskritóriu.

Kria estratéjia atu fornese orsamentu ka fahe-kustu ho DPO, OPA no organizasaun komunitáriu sira seluk inklui organizasaun sira ne’ebé mak reprezenta grupu sira ne’ebé mak iha risku liu ba eskluzaun.

Orientasaun ba asaun xave 9.2: Fahe informasaun kona-ba uza Ita-Boot nia rekursu sira ho ema idozu no ema ho defisiénsia no fornese oportunidade ba sira atu fó komentáriu.

Fornese informasaun iha formatu oioin kona-ba oinsá Ita-Boot nia organizasaun uza ninia rekursu atu fasilita ema idozu no ema ho defisiénsia asesu ba servisu ho hola parte iha prosesu foti desizaun. No mós fornese informasaun kona-ba Ita-Boot nia organizasaun ninia dezempeñu hasoru indikadór no alvu sira (haree padraun prinsipál ba inkluzaun 2, Nota orientasaun kona- ba barreira ba informasaun).

Apoiu ema idozu no ema ho defisiénsia atu fahe sira nia komentáriu oinsá Ita-Boot nia organizasaun uza ninia rekursu sira:

Fó hatene sira oinsá atu hatama komentáriu no oinsá Ita-Boot sei akompaña problema sira ne’ebé mak sira fó hatene ona;
Planu kanál komunikasaun ida ne’ebé mak asesível ba ema idozu no ema ho defisiénsia atu hatama sira nia komentáriu, no orsamentu ba atividade hirak ne’e;
Foti asaun bazeia ba komentáriu ne’ebé mak Ita-Boot simu; no
Husu ema ne’ebé mak hatama ona sira nia komentáriu atu komenta oinsá Ita-Boot nia organizasaun responde ona ba komentáriu hirak ne’e

Ba orientasaun klaru liután, haree Padraun prinsipál ba inkluzaun 5, Nota orientasaun kona-ba dezeñu mekanizmu hato’o komentáriu no hatama keixa.

Estudu kazu

Traballu entre organizasionál atu promove inkluzaun

Liuhusi ninia programa umanitáriu, organizasaun Islamic Relief Worldwide espesífikamente estende sira nia asisténsia ba to’o iha grupu sira ne’ebé mak iha risku liu.

Maibé avaliasaun organizasionál iha tinan-2015, foka makas ba lakuna iha inkluzaun ema idozu no ema ho defisiénsia iha sira nia prátika organizasionál. Revizaun kona-ba instrumentu programa identifika área espesífiku ne’ebé bele haforsa liu-tán prátika inkluzivu. Ezemplu, instrumentu avaliasaun nesesidade ne’ebé organizasaun uza, la-presiza dadus relasiona ho tinan atu dezagrega ba tinan-50 ba leten, no laiha dalan atu kolekta informasaun kona-ba ema ho defisiénsia.

Uza revizaun no avaliasaun hanesan oportunidade ida atu hadi’ak, sira forma ona grupu traballu ida ne’ebé sensitivu no inkluzivu. Grupu ne’e halibur asesór tékniku sira husi ekipa país atu identifika no hatán ba prátika sira ne’ebé mak la- inkluzivu.

Grupu traballu ajuda organizasaun sira halo ona mudansa barak ne’ebé susesu. Izemplu, halo ona revizaun ba matadalan avaliasaun nesesidade no avaliasaun ba resposta rápida atu garante katak dadus ne’ebé kolekta ona dezagrega liuhusi tinan, sexu no defisiénsia. Halo mós revizaun ba matadalan organizasionál hanesan formatu proposta, matadalan hakerek proposta no manuál jestaun bazeia ba rezultadu. Fó ona apoiu tékniku ba staff kampu, no modifika ona pakote treinamentu kona-ba protesaun no inkluzaun ba staff.

Instrumentu dezeñu programa ne’ebé mak foin lailais ne’e hetan revizaun ajuda ona hodi dezenvolve projetu foun ho liña orsamentu dedikadu ba prátika inkluzivu. Serbisu hamutuk atu dokumenta no fahe informasaun entre organizasaun, ajuda ona organizasaun Islamic Relief Worldwide atu foti medida konkreta hodi integra prátika inkluzivu iha kualker aspeitu husi sira nia serbisu. Fontes: Islamic Relief Worldwide

Fontes: Islamic Relief Worldwide

Change Your Password